सुसनलाई प्रधानमन्त्रीको सल्लाह : कुकुर भुक्दै गर्छ, हरेस नखानु

हिजो बालुवाटारमा प्रधानमन्त्रीसँग डेढ घण्टा भेटेपछि कर्माचार्यले नियोजित ढंगले आफ्नो चरित्र हत्यामा उत्रेका केही सञ्चारकर्मीबिरुद्ध साईबर क्राइमको उजुरी हाल्ने बताएकी छन् । यसनिम्ति प्रधानमन्त्रीले सहमति दिनुभएको र भण्डारामा सशस्त्रको बाहिनी उदघाट्नपछि चितवनबाट गृहमन्त्री फर्कनासाथ भोलि भेटेर बिध्युतीय कारोवार ऐनअन्तर्गत मुध्दा दर्ता गरिने सुसनको कथन छ । छोरी र श्रीमानलाई सँगै लिएर बालुवाटार छिरेकी उनले घटनाक्रमको बेलिबिस्तार लगाउँदा प्रधानमन्त्रीले अनावश्यक हल्लाको पछि लागेर करियर नबिगार्न पनि सल्लाह दिनुभएको बताइन्छ ।

आफूलाई अनावश्यक ढंगले प्रायोजित मान्छेहरू र बालुवाटार नजिकको भनिएका सञ्चारकर्मीले अफवाह फैलाएको,चरित्रमाथि नै धावा लाग्नेगरी योजनाबद्ध समाचार सम्प्रेषण गरेको भन्दै कर्माचार्यले गुनासो गरेकी थिइन् । पछि प्रधानमन्त्रीले ‘यस्तो हल्लाको पछि लाग्नु हुँदैन । यस्तो त भइरहन्छ, आत्तिनु हुँदैन’ भन्नुभएको थियो । पार्टीभित्रका एकथरी मान्छेले पारिवारिक,सामाजिक र राजनीतिक सम्बन्धमा आँच आउने गरी अफवाह फैलाएको भन्दै केहीको नाम लिँदा प्रधानमन्त्रीले एक, दुई जनालाई आफूले पनि चिनेको बताउनुभएको थियो ।

महिलाले कुनै व्यावसायिक काम गर्न नहुने हो ? घरमा भात पकाएरै मात्र बसुँ ?

प्रधानमन्त्रीसँग भेट भएको स्वीकार्दै सुसनले भनिन् ‘आफू महिला भएको नाताले राष्ट्रपतिसँग भेटेर अहिलेको परिस्थितिमा फैलाइएको हल्ला र अफवाहको बारेमा जानकारी गराउने र त्यसनिम्ति समय मिलाइदिन आग्रह राख्दा प्रधानमन्त्रीले पनि ‘हुन्छ’ भन्नुभएको छ ।’ एकजना सञ्चारकर्मीलाई प्रधानमन्त्रीले समेत राम्रोसँग चिनेको बताउँदै भन्नुभयो,‘जनता टाइम्सवाला गणेश बस्नेतलाई मैले चिनेको छु तर सूर्योदय चलाउने राजकुमार रेग्मीलाई चिन्दिनँ ।’ सोही प्रसंगमा उहाँले आफूलाई समेत धेरैले मनपरी लेख्ने र भन्ने गरेको उल्लेख गर्दै ‘कुकुरहरू भुकिरहन्छन्,भुक्न देऊ तर आफू लम्किने काम नरोक ।’भन्ने सल्लाह दिनुभयो ।

राजनीतिक प्रतिशोधको रिस महिलामाथि पोख्ने काम भएको सन्दर्भमा सुसनले प्रधानमन्त्रीसँग ‘के त्यसोभए महिलाले कुनै व्यावसायिक काम गर्न नहुने हो ? घरमा भात पकाएरै मात्र बसुँ ? पार्टी र नेतृत्वले त्यहि भन्छ भने आफू त्यही गर्न तयार रहेको’ बताउँदा उहाँले ‘त्यसो होइन अघि बढ्नुपर्छ’ भन्नुभएको स्रोतले दाबी गरेको छ । उनले अगाडि पीडा पोखिन्-खुद मैले नै मेरो फेसबुक वालमा राखेको फोटो झिकेर काटकुट पारी बेइज्जत गर्न पाइन्छ ?
प्रधानमन्त्री र आफ्ना बाउ- आमावीचको संवाद सुनेपछि छोरीले भनिन्-जब यहाँ काम गर्ने वातावरण हुन्न,पाइला पाइलामा हुर्मत लिइन्छ अनि नेपाली युवाहरु बिरक्तिएर बिदेश पलायन हुनुको बाध्यता पुष्टि हुन्छ ।