प्रधानमन्त्री विरुद्ध बयलगाडा प्रदर्शन

संसद विघटन गर्ने प्रधानमन्त्री केपी शर्मा ओलीको असंवैधानिक कदम बिरुद्ध नेकपाको विद्यार्थी संगठन अनेरास्ववियुले दोस्रो चरणको आन्दोलनको कार्यक्रम घोषणा गरेको छ । मंगलबार जारी गरिएको प्रेस विज्ञप्तिमा संगठनले पुस २१ गतेदेखि २९ गतेसम्मको लागि तय गरेको कार्यक्रममा पहिलो दिन ओली सरकारका मन्त्रीहरूलाई कालो झण्डा देखाउने र सोही दिन प्रत्येक कलेजमा कालो ब्यानर प्रदर्शनसहित कोण सभा गर्ने भएको छ ।

२२ गते उपत्यकामा लाल्टिन जुलुश र उपत्यका बाहिर आवश्यकताअनुसार लाल्टिन, सिठी र लाठी जुलुश निकालिने छ । पुस २३ गते प्रधानमन्त्रीको पुत्ला दहन गर्ने, २४ गते जिल्ला प्रशासन कार्यालयमा ज्ञापन पत्र बुझाउने र धर्ना दिने तथा २५ गते असंवैधानिक कदम विरुद्ध सडक बहस सञ्चालन गर्ने विज्ञप्तिमा उल्लेख छ ।

प्रदर्शनको क्रममा २६ गते बयलगाडा प्रदर्शन गर्ने, २७ गते प्रतिगमनविरुद्ध सडक कविता, गीत तथा गजल कार्यक्रम गर्ने, २८ गते सडक नाटक, सडक कला (स्ट्रीट वाल पेण्टिङ्ग) र २९ गते सडकमा प्ले कार्डसहित कार्टुन प्रदर्शन गरिने बताइएको छ । अनेरास्ववियुले प्रधानमन्त्रीको असंवैधानिक कदम नसच्चिएसम्म आन्दोलनको कार्यक्रम जारी राख्ने बताउँदै तेस्रो चरणको कार्यक्रम माघ १ गते सार्वजनिक गर्ने जानकारी दिएको छ ।