नेपालमा पनि नयाँ कोरोना भाइरस भेटियो

कोभिड–१९ को नयाँ भाइरस नेपालमा भित्रिएको पुष्टि भएको छ ।

पुस पहिलो साता बेलायतबाट आएका तीन जनामा नयाँ प्रकारको कोभिड–१९ पुष्टि भएको हो । स्वास्थ्य मन्त्रालयका अनुसार नयाँ कोरोना देखिएकाहरूमा २८ वर्षीया महिला तथा ३२ र ६७ वर्षीय पुरुषमध्ये २८ वर्षीया महिला र ३२ वर्षीय पुरुषको पछिल्लो परीक्षणमा नेगेटिभ देखिएको छ । तर, ६७ वर्षीय पुरुष अझै पोजेटिभ नै छन् ।

गत पुस पहिलो साता बेलायतबाट आएका ६ जनामा १३ पुसमा कोरोना संक्रमण पुष्टि भएको थियो । तर, जिन सिक्वेसिङ नभएका कारण नयाँ प्रकारको भाइरस भए नभएको खुलेको थिएन । पछि २७ पुसमा उनीहरूको नमुना परीक्षणको लागि हङकङको प्रयोगशालामा पठाइयो । त्यसमध्ये ३ जनामा नयाँ भाइरस पुष्टि भएको छ ।