अदालतले छाडेपछि नेवारहरुले निकाले जुलुश

गत सातादेखि महानगरीय प्रहरी बृत्त बालाजुले गैरन्यायिक थुनामा राखेका उपत्यका सडक विस्तार पीडित संघर्ष समितिसम्बध्द अभियन्ताहरूलाई सर्वोच्च अदालतले आज रिहा गरिदिएको छ । गैरन्यायिक थुनाबिरूद्ध दायर भएको बन्दी प्रत्यक्षीकरण रिटमा आज सर्वोच्च अदालतले दिएको आदेशपछि सबै बन्दी थुनामुक्त भएका हुन् ।

यसैबीच आज साँझ राजधानीको इन्द्रचोकबाट राष्ट्रिय पहिचान संरक्षण संयुक्त संघर्ष समिति र सेभ नेपा भ्याली मुभमेण्ट,नेवाः संघ,उपत्यकाव्यापी सडक विस्तार पीडित सङ्घर्ष समिति,जन सरोकार समन्वय समिति,जागरुक युवा समाज,प्रगतिशील नागरिक मञ्च,जनसरोकार समिति खोकनाले संयुक्त मैनबत्ती जुलुश निकालेका छन् ।

नेपाल सरकारबाट हुँदै आएको नेवाः भूमि अतिक्रमण र भाषिक–सांस्कृतिक दमनबिरुद्ध मैनबत्ती जुलुश आयोजना गरिएको आयोजक समितिका श्यामकृष्ण प्रजापतिले जानकारी दिएका छन् ।

कार्यक्रममा विवेकशीलका प्रदेश सांसद विरजभक्त श्रेष्ठ,पत्रकार तथा सामाजिक अभियन्ता नारायण वाग्ले,गणपतिलाल श्रेष्ठ, उपत्यकाव्यापी सडक विस्तार सङ्घर्ष समितिका संयोजक सुमन सायमीलगायतको उपस्थिति थियो ।

इन्द्रचोकबाट शुरु भएको जुलुश भेँडासिंह,क्षेत्रपाटी,ढल्को हुँदै कालिमाटी चोकसम्म पुगेको थियो