राष्ट्रपति र उपराष्ट्रपति पशुपतिमा

महाशिवरात्रीको अवसरमा दर्शन गर्न पशुपतिनाथ मन्दिर पुग्ने भक्तजनको संख्या बढ्दै गएको छ । अपरान्ह चार बजेसम्म झन्डै एक लाख दर्शनार्थी पशुपति मन्दिर पुगेका छन् ।

बिहान साढे ९ बजेसम्म ३५ हजार जना दर्शनको लागि पुगेका थिए भने साढे ११ बजे त्यो संख्या ५६ हजार पुगेको थियो ।

अपरान्ह चार बजे पशुपतिनाथ दर्शनको लागि पुगेका भक्तजन र दर्शनार्थीहरुको संख्या ९५ हजार नाघेको छ । त्यसैगरी अहिले पशुपतिमा दर्शनको लागि लाइनमा रहेका दर्शनार्थीहरुको संख्या १३ हजार माथि रहेको बताइन्छ ।

पशुपतिनाथको दर्शन तथा पूजाका लागि केही बेरअघि राष्ट्रपति विद्यादेवी भण्डारी पनि पशुपति मन्दिर पुग्नुभएको थियो । उहाँ अपरान्ह ४ : ४३ मा पशुपति मन्दिर पुगेर पूजा आराधना गरि ५ : ७ बजे सितल निवासतर्फ प्रस्थान गर्नुभएको छ ।

त्यसैगरी, उपराष्ट्रपति नन्दबहादुर पुन पनि पशुपतिनाथ पुग्नुभएको छ । साँझ ५ : २३ बजे त्यहाँ पुग्नुभएका उपराष्ट्रपति पुन पूजा आराधना गरि ५ : ४५ बजे निवास फर्किनुभएको छ ।