संखुवासभामा बस पल्ट्यो, १३ जना गम्भीर घाइते

आज बिहान संखुवासभाको धर्मदेवी नगरपालिका–४, पुलुवाखोला नजिकै भएको बस दुर्घटनामा १३ जना यात्रु गम्भीर घाइते भएका छन् । संखुवासभाको मादीबाट धरानतर्फ जाँदै गरेको बस पुलुवाखोला नजिकै दुर्घटनामा परेको हो ।

बसमा ४० जना यात्रु रहेको बताइएको छ । गम्भीर घाईतेलाई उपचारार्थ घोपा क्याम्प, धरान लगिएको छ भने अन्य सामान्य घाईतेहरुलाई उपचारको लागि स्वास्थ्य चौकी चैनपुरतर्फ लगिएको छ ।

दुर्घटनामा उद्धारको लागि ४ नम्बर गुल्मको टोली र नेपाल प्रहरीको संयुक्त टोली खटिएको बताइएको छ ।