मिति अगावै बैंकले चेक साटी दिएपछि ..

भेरीगंगा नगरपालिका छिन्चुका व्यवसायी अम्मर ओलीले साउन २१ गते साटिने गरी दिएको चेक सिभिल बैंक सुर्खेत शाखाले ७ दिन अगावै साटिदिएको छ ।

व्यवसायिक सिलसिलामा ‘ब्याक डेट’ (पछि आउने मिति)मा साटिने गरी उनले भुपेन्द्र लामिछानेको नाममा दिएको रु. ४६ हजार ५ सय रुपैयाँ उल्लेख भएको चेक बैंक शाखा सुर्खेतका कर्मचारीले साउन १५ गते अर्थात ७ दिनअगावै साटिदिएका हुन् ।व्याक डेटका लागि दिएको चेक अगावै साटिएर सोहीबमोजिम खाताबाट पैसा घटेको मोबाइलमा म्यासेज आएपछि थाहा पाएको र बैंकले गल्ती स्वीकार नगरी आफूलाई चेकमा मिति सच्चाइदिन भन्दै पटक–पटक दवाव दिएकोले फोन स्वीच अफ गरी सम्पर्कविहीन हुन बाध्य बनाएको ओलीले जानकारी दिए ।

बैंकका शाखा म्यानेजर त्रिलोक उपाध्यायले भने मानवीय त्रुटीका कारण यस्तो भएको भन्दै स्वीकार गरेका छन् । यस्तै चेक आधिकारिकता हो वा होइन,सटही योग्य छ छैन भन्नेजस्ता कुरा प्रमाणित नगरेरै व्याक डेटको चेक सटही गर्नु जघन्य वित्तीय अपराध भएको नेपाल राष्ट्र बैंक कर्णाली प्रदेशका प्रमुख डा. शालिकराम पोखरेलले बताए ।