पिलो निचोरे पनि ओलीलाई आनन्द नआएको माधव नेपालको ठोकुवा

नेपाल कम्युनिष्ट पार्टी (एकीकृत समाजवादी) का अध्यक्ष माधवकुमार नेपालले एमालेबाट आफूहरु चोइटिएर हाइसञ्चो भएको भन्ने केपी ओलीलाई कुनै आनन्द नरहेको बताउनुभएको छ । केही समयअघि ओलीले भन्नुभएको भनाइप्रति लक्षित गर्दै उहाँले पिलो निचोरिएको भन्नेले संसदमा दिनदिनै किन कुर्लिएको भनेर जिज्ञासा राख्नुभएको छ ।

उहाँले सर्वोच्च अदालतमा विचाराधीन विषयमा संसदमा कुरा उठाउन नपाइने संवैधानिक व्यवस्था भए पनि एमाले सांसदहरु अरुको काँध चढ्दै र माइक खोस्दै नाक भाँचिदिन्छु भनेर संसदमा उफ्रिएको सम्बन्धमा आश्चर्य व्यक्त गर्नुभएको हो ।

आज पेशागत महासंघ नेपाल, राष्ट्रिय समितिको विस्तारित बैठकलाई सम्बोधन गर्ने क्रममा अध्यक्ष नेपालले उक्त भनाइ राख्नुभएको हो । त्यसक्रममा उहाँले प्रदेश नं. १ र बागमती प्रदेशमा छिट्टै आफ्नो पार्टीको नेतृत्वमा सरकार बन्ने दाबीसमेत गर्नुभएको छ ।

उहाँले प्रदेश नम्बर २, कर्णाली र सुदूरपश्चिम प्रदेशमा आफ्नो पार्टीको सशक्त उपस्थिति रहेको उल्लेख गर्दै नेताहरुलाई धन्यवाद समेत व्यक्त गर्नुभएको छ ।