तोकिएका कर्मचारीको मात्र तलब भत्ता दिन सकिने स्वास्थ्य मन्त्रालयको भनाइ

स्वास्थ्य तथा जनसंख्या मन्त्रालयले दरबन्दीभन्दा बढी कर्मचारीलाई तलब भत्ता दिन नसकिने बताएको छ । मन्त्रालयले आज सात वटै प्रदेश र सात सय ५३ स्थानीय तहलाई परिपत्र गर्दै दरबन्दीभन्दा बढी कर्मचारीलाई थप तलब भत्ता दिन नसकिने जानकारी गराएको हो ।

मन्त्रालयले दरबन्दी यकिन गरेर मात्र रिक्त दरबन्दीमा सहमति दिन सबै प्रदेश तथा स्थानीय तहलाई आग्रह गरेको छ । हाल कर्मचारी समायोजन मिलानसम्बन्धी मापदण्ड २०७७ तथा स्वास्थ्य सेवाका कर्मचारीको समायोजन मिलानसम्बन्धी व्यवस्था २०७७ बमोजिम सम्बन्धित तहको दोहोरो सहमतिका आधारमा मन्त्रालयबाट स्वास्थ्य सेवाका कर्मचारीको समायोजन मिलान भइरहेको छ ।दोहोरो सहमतिअनुसार समायोजन मिलान भएका कर्मचारीलाई केही प्रदेश, स्थानीय तहहरूले दरबन्दी रिक्त नभएका कारण हाजिर गराउन नसकिने भनी फिर्तासमेत पठाएका छन् । केही प्रदेश, स्थानीय तहले स्वीकृत दरबन्दीभन्दा बढी कर्मचारीलाई सहमति दिई थप तलब भत्ता माग गरेपछि मन्त्रालयले पछिल्लो निर्देशन दिएको हो ।