अध्यक्ष उपेन्द्रमाथि आरोप लगाउँदै जसपा जनप्रतिनिधिले पार्टी छाडे

जनता समाजवादी पार्टी (जसपा) बाट निर्वाचित सिरहाको औरही गाउँपालिका–३ की उपाध्यक्ष सीताकुमारी यादवले पार्टी परित्यागको घोषणा गरेकी छन् । आज विज्ञप्ति जारी गर्दै उनले साधारण सदस्यसमेत नरहने गरी जसपा छाडेको जानकारी गराएकी हुन् ।

उपाध्यक्ष यादवले अध्यक्ष उपेन्द्र यादवले आफूमाथि अन्तर्घात गरेकाले पार्टी छाड्न बाध्य भएको बताएकी छन् । पाँच वर्षसम्म गरेको राम्रो कामको पार्टीले मूल्याङ्कन नगरेको उनले आरोप लगाएकी छन् ।

यसबारे जिल्ला पार्टीको कार्यसमितिमा दिएको निवेदन सुनुवाइ नभएको, जिल्ला अध्यक्षलाई दिएको निर्देशन पालना नभएको र केन्द्रीय अध्यक्षलाई दिएको ज्ञापनपत्रमाथि कुनै चासो नदिएका कारण पार्टीबाट अलग हुनुपरेको उनको तर्क छ ।

निर्वाचनको मिति नजिकिएसँगै तराई–मधेशमा बहालवाला जनप्रतिनिधि नै धमाधम पार्टी छाडिरहेका छन् । यसअघि वीरगञ्ज महानगरपालिकाका मेयर विजय सरावगी जसपा छाडेर एमालेमा गएका थिए । पुनः जनप्रतिनिधि बन्न चाहेकाहरु टिकटको सुनिश्चितताका लागि पार्टी चाहार्दै हिँड्नेक्रम सबैतिर देखिए पनि मधेशमा अत्यधिक देखिन्छ ।