अर्थमन्त्रालयमा हिजो महिला, आज सहकारी

मुलुक चरम आर्थिक संकटमा पुगेको भनिएका बेला आगामी आर्थिक वर्षको नीति कार्यक्रम तथा बजेट बनाउने तयारीमा रहनुभएका अर्थमन्त्री जनार्दन शर्मा प्रभाकरले सरोकारवालाहरुसँगको छलफललाई तीव्रता दिनुभएको छ ।

हिजो महिलाका सरोकारबारे कुराकानी गर्नुभएका मन्त्री शर्माले आज सहकारी क्षेत्रका सारोकारवालाहरुसँग अन्तरक्रिया गर्नुभएको छ । दिउँसो अर्थ मन्त्रालयमा भएको छलफलमा अर्थमन्त्रीले बजेटमा सहकारी क्षेत्रलाई प्राथमिकता दिने गरी गृहकार्य भइरहेको बताउनुभयो । उहाँले सबैको सुझाव संकलन गरेर बजेटमा समेट्ने प्रयास गरिने पनि प्रष्ट पार्नुभयो ।

‘छलफलमा सहकारी क्षेत्रलाई राम्रो गर्ने बिषयमा धेरै सुझाव आएका छन् । यी सुझावलाई बजेटमार्फत सम्बोधन गर्ने प्रयास गरिनेछ’ मन्त्री शर्माले भन्नुभयो ।

छलफलमा सहकारी क्षेत्रका दुई दर्जनभन्दा बढीको सहभागिता थियो । उनीहरुले सहकारीलाई घर घरसम्म लैजान प्रोत्साहन गर्नुपर्ने, कर्जा असुली न्यायाधिकरणलाई प्रभावकारी बनाउनुपर्ने, सहकारीमा हुने बदमासीलाई नियमन गर्न कडा कानुनी व्यवस्था गरिनुपर्ने, सहकारी विकासका लागि अनुसन्धानका कामहरु हुनुपर्नेलगायतका सुझाव दिएका थिए ।

अर्थ मन्त्रालयले आगामी आबको बजेट निर्माणका लागि निरन्तर छलफल गर्दै आएको छ । अहिलेसम्म कृषि, शिक्षा, निजी क्षेत्र, बैंक, बित्तीय संस्था र बिमा, संघीयता, पूर्वाधार, दलित, अपाङ्गता, अर्थविद्लगायत क्षेत्रका प्रतिनिधिसँग छलफल भइसकेको छ । मन्त्रालयले बजेटका लागि सुझाव लिन सांसद, पूर्व अर्थमन्त्रीहरु, युवा तथा बिद्यार्थीलगायतसँग पनि छलफल गर्ने तयारी गरेको छ ।

भौतिक रुपमा छलफलमा उपस्थित भई सुझाव दिन नसक्ने सर्वसाधारणका लागि मन्त्रालयले ११३८ नम्बरको टोल फ्रि उपलब्ध गराएको छ । कार्यालय समयमा फोन गरी सुझाव दिन सकिने टोल फ्रि नम्बरमा पनि उत्साहजनक हिसाबले सुझावहरु आइरहेको मन्त्रालयले जनाएको छ ।