माओवादीको आधार किल्लामा ‘पुरुषै पुरुष, महिला शून्य’

माओवादीको आधार किल्लाको रुपमा परिचित रुकुम पश्चिम जिल्लाका एउटा पनि स्थानीय तहले प्रमुखको उम्मेदवारीमा महिला पाएका छैनन् । बाध्यकारी संवैधानिक प्रावधानअनुरुप जिल्लाका स्थानीय तहमा महिलालाई उपाध्यक्षको उम्मेदवारमा मात्र सीमित गराइएको छ ।

हिजो पुरुषसँगै जनयुद्धमा होमिएका महिला नेतृहरुलाई यसपटक पनि उपेक्षा गरिएकोमा असन्तोष बढेको पाइएको छ । यद्यपि केही दिनअघि मात्र नेकपा (माओवादी केन्द्र) ले हरेक जिल्लामा कम्तिमा एउटा महिला प्रमुख र हरेक स्थानीय तहमा एउटा वडा प्रमुख बनाउने निर्णय गरेको थियो ।

रुकुममा २०७४ को स्थानीय तहको निर्वाचनमा पनि कुनै पनि तहमा महिलाले प्रमुख पद जित्न सकेका थिएनन् । त्यतिखेर सबै छ वटा स्थानीय तहमा माओवादी केन्द्रले नै जीत हासिल गरेको थियो । उम्मेदवारी छनौटमा भने माओवादीमा नातावाद,कृपावाद त्यतिबेला नै मौलाएको बताइन्छ ।

रुकुम पश्चिम अर्थमन्त्री जनार्दन शर्माको गृहजिल्ला हो । उनले त्यहाँ लगाउँदै आएको नारा ‘महिला पहिला’ नारामै सीमित भएको छ, व्यवहारमा परिणत भएको छैन भनिन्छ ।