गुल्मीमा माओवादी जिताउन एमाले उम्मेवारद्वारा नाम फिर्ता

गुल्मीको धुर्कोट गाउँपालिकामा माओवादी उम्मेदवारलाई विजयी गराउन नेकपा एमालेको तर्फबाट गाउँपालिका अध्यक्ष उम्मेदवारले नाम फिर्ता लिएका छन् ।

एमालेका गोपाल कुँवरले उम्मेदवारी फिर्ता लिएपछि माओवादीबाट अध्यक्ष पदका उम्मेदवार भुपाल पोखरेललाई सहज भएको हो ।

कुँवरले नेकपा माओवादी केन्द्रका उम्मेदवारलाई समर्थन गर्दै उम्मेदवारी फिर्ता लिएको बताइन्छ । उक्त गाउँपालिकामा नेकपा एमालेबाट गाउँपालिका अध्यक्ष कुँवर र उपाध्यक्षमा सीता गिरीले उम्मेदवारी हालेका थिए ।

नाम फिर्ता लिएपछि धुर्कोटमा माओवादी केन्द्रका उम्मेदवार पोखरेल र एमालेका उपाध्यक्ष पदका उम्मेदवार गिरी मात्रै रहेका छन् ।

उनीहरुको प्रतिस्पर्धा नेपाली काँग्रेस र नेकपा एकीकृत समाजवादीका उम्मेदवारसँग हुने बताइएको छ । त्यहाँ काँग्रेस र एकीकृत समाजवादीबीच तालमेल छ ।