काठमाडौंमा २३ वटा वडाको मतगणना सकियो, बालेन नै अगाडि

काठमाडौं महानगरको २३ वटा वडाको मतगणना सकिएको छ । ती वडाका एक लाख ५७ हजार मतगणना भएको छ । पछिल्लो मतपरिणामअनुसार स्वतन्त्र उम्मेदवार बालेन साह फराकिलो मतान्तरसहित अग्रस्थानमा छन् । उनले ५१ हजारभन्दा बढी मत प्राप्त गरिसकेका छन् ।

दोस्रो स्थानमा रहेकी सिर्जना सिंहले ३२ हजार ४३० मत पाएकी छन् । नेकपा एमालेका उम्मेदवार केशव स्थापितले ३१ हजार ८५६ मत ल्याएका छन् ।अहिलेसम्म वडा नम्बर १, २, ३, ४, ५, ६, ७, ८, ९, १०, ११, १२, २२, २३, २४, २५, २६, २७, २८, २९, ३०, ३१ र ३२ को अन्तिम मतपरिणाम सार्वजनिक भइसकेको छ ।

हालसम्म काँग्रेसले १४ वटा वडा जितेको छ । एमालेले नौ वटा वडामा जित हासिल गरेको छ । काठमाडौंमा माओवादीको उपस्थिति देखिएको छैन ।