राज्यसत्ताका सबै संयन्त्रसहित छिमेकी मुलुकलाई पनि काबुमा लिने दलालको दाबी

सुरक्षा निकायका हतियार खरिद,राशन, ठूला परियोजनालगायतमा बिचौलियाको भूमिका निभाउँदै आएका दीपक भट्ट पछिल्लो पटक नयाँ काण्डमा मुछिएका छन् । नेपाल प्रहरीले खरिद गर्न लागेको ८४ करोड रुपैयाँको हतियारमा मतियार बनेको रहस्य उनकै मुखबाट खुलेको हो ।

अहिले विवादमा आएको उक्त हतियारलाई कसरी नेपाल भित्र्याउने,बीचमा आउने समस्यालाई कसरी समाधान गर्ने र त्यसमा छिमेकी मुलुक भारतको चासोलाई समेत मिलाउने उनको रणनीति बाहिरिएको छ । प्रहरीको हतियार खरिदनिम्ति माहौल प्रतिकूल भएकाले उनले सबैलाई आफूले व्यवस्थापन गर्ने आश्वासन दिएका छन् ।

मुलुकको सार्वभौमसत्ता सम्पन्न संसदको सार्वजनिक लेखा समिति र अर्को राज्य व्यवस्था समितिलाई आफूले ह्याण्डिल गर्ने सजिलो जवाफ समेत उनैले दिएका छन् । भट्टको उक्त जवाफले उक्त समितिको हैसियत र त्यसमा आवद्ध सांसदहरुको मर्यादा र क्षमतालाई समेत गिज्याएको छ ।

उनले भनेका छन्, ‘लेखा समिति र राज्य व्यवस्था समिति म ह्यान्डल गर्छु । मेरो त्यो हैसियत छ म गर्न सक्छु ।’ अननेसेसरी उनीहरुले दुःख नदिने कुरो विश्वस्तसँग भनेका दीपकको उक्त वाक्यले यसअघि पनि सेटिङमा काम फत्ते हुने गरेको सजिलै अनुमान लगाउन सकिन्छ ।

उनले संसदको विपक्षी दल एमालेसँगे सत्तारुढ दल काँग्रेसलाई पनि सजिलै मनाउन सकिने खालको धारणा राखेको पाइन्छ । उनले सांकेतिक रुपमा भनेका छन्, ‘अपोजिसन पार्टीमा लाजिम्पाट र सानेपा छ । त्यो दुईवटै म ह्यान्डल गर्न सक्छु ।’

मुलुकभित्रको सबै प्रपञ्च मिलाएपछि हतियार खरिदमा भारतीय संस्थापन पक्षको असन्तुष्टीलाई पनि उनले सजिलैसँग मिलाइदिने आश्वासन दिएको वार्तामा सुनिन्छ । उनको भनाइ छ, ‘भनेपछि अब मोदी मिलाउनुपर्ने भए मोदी र चाइना पनि मिलाउँला, त्यो पर्दैन ।’

त्यहि सन्दर्भमा उनले भारतीयहरुले नेपालले हतियार खदिर गर्दा सँधै हस्तक्षेप गर्ने गरेको उनै बिचौलियाको स्वीकारोक्ति छ । उनको भनाइअनुसार भारतीयले ‘इन्टरफेयर’ गरेर चाइनिज हतियार किन लिने ? भनेर सोध्ने गरेको उनको आशय छ । अहिले नेपाल सरकारले खरिद गर्न लागेको हतियार इटालीको भए पनि चीन हुँदै आउन लागेकाले चीन मुछिएको हो ।

चीनसँग हतियार लिनुको सट्टा भारतीयले आफ्नै हतियारको लागि अनुरोध गर्ने गरेको पनि भट्टको दाबी छ । उनले सञ्चार प्रविधि र हतियार छिमेकीसँग लिन नहुने कुरो समेत गरेका छन् । भारत र चीनसँग हतियार र प्रविधि खरिद गर्नुको सट्टा आवश्यकताअनुसार भवन बनाइदिन अनुरोध गर्नुपर्ने उनको सल्लाह छ ।
प्रहरीको हतियार खरिदको सन्दर्भमा छिमेकी मुलुकलाई विश्वस्त तुल्याउन चीनलाई हतियारको सट्टा पाँच वटा दंगा नियन्त्रण गणको पूर्वाधार बनाइदिन र भारतलाई प्रहरी प्रशिक्षण प्रतिष्ठान बनाइदिन अनुरोध गर्नुपर्ने उनको सुझाव छ । सम्भवतः उनको यो सुझाव सरकारमा रहेका उच्च राजनीतिक नेतृत्वसँग भएको कुराकानीमा उल्लेख गरिएको अनुमान छ ।

यता भारतले पनौती नजिकै प्रहरी एकेडेमी बनाइदिन लागेको सन्दर्भमा उनले भारतलाई पूर्वाधार र यातायातको माग गर्नुपर्ने भनेका छन् । तर सञ्चार सेट वा हतियार माग्न नहुने उनको सल्लाह छ । यी सबै सन्दर्भ उल्लेख गरेपछि उनले संवादमा रहेकासँग सोधेका छन्, ‘यत्ति भएपछि काम हुन्छ कि हुँदैन ? अब त्यो सबैपछि एउटा के हुनुपर्छ भने मैले यति कुद्ने भनेपछि सबैको केही न केही आश त हुन्छ । भलै पैसा नमाग्ला । कसैलाई टिकट कनिदिनुपर्ला । कसैको छोरालाई भर्ना गरिदिनुपर्ला ।’