हेर्दाहेर्दैमा उमागौरी सहकारी ठगीको मुद्दा, बाँकी बयान पर्सि

सार्वजनिक लेखा समितिका सभापति ऋषि पोखरेल पत्नी अञ्जला कोइरालासमेत २६ जना जोडिएको मोरङको उमागौरी कृषि सहकारी संस्था ठगी मुद्दा हेर्दाहेर्दैमा राखिएको छ । सहकारी ठगी कसुरमा मुद्दा दर्ता भएपछि फरार अध्यक्ष शम्भुप्रसाद रौनियार अस्ति जिल्ला अदालत मोरङमा हाजिर भएपछि थालिएको बयान नसकिएपछि पर्सिसम्मलाई हेर्दाहेर्दैमा परेकोे छ ।

न्यायाधीश अरुणकुमार झाको इजलासले रौनियारलाई प्रहरीको जिम्मा लगाएर मुद्दालाई हेर्दाहेर्दैमा राखेको छ । आज र भोलि सार्वजनिक बिदा भएकाले प्रहरीले उनलाई पर्सि अदालतमा उपस्थित गराउनेछ । त्यसपछि मात्र उनलाई धरौटीमा छाडिन्छ या पुर्पक्षको निम्ति जेल चलान हुन्छन् भन्ने टुंगो लाग्नेछ । 

धनपालथान गाउँपालिका–४ कर्सिया बजारमा रहेको उमागौरी कृषि सहकारीको रकम हिनामिना कसुरमा अध्यक्ष रौनियार र समिति सभापति ऋषिकेश पोखरेलकी पत्नी अन्जला कोइरालासहित २६ जनालाई प्रतिवादी बनाएर अदालतमा मुद्दा दर्ता गरिएको थियो । मुद्दामा २२ करोड ४८ लाख २७ हजार ७०० रुपैयाँ बिगो मागदाबी गरिएको छ । 

मुद्दाका सबै फरार प्रतिवादीहरु अदालतमा हाजिर भइरहेका छन । प्रहरीले अध्यक्ष रौनियारसहित २५ जना विरुद्ध अदालतबाट पक्राउ पुर्जी लिएको थियो । तर हालसम्म प्रहरीले कसैलाई पनि पक्राउ गरेको छैन ।

जिल्ला अदालतका सूचना अधिकारी हेम बुढाथोकीका अनुसार उक्त मुद्दामा हालसम्म २८ जनामध्ये आठ जना प्रतिवादीहरु अदालतमा हाजिर भैसकेका छन । तीमध्ये चार जना धरौटीमा छाडिएका छन् । एक जनालाई अदालतले पुर्पक्षको निम्ति कारागार पठाएको छ । 

यता अध्यक्ष रौनियारको बयान जारी छ । कोइराला पनि अदालतमा हाजिर भएकै दिन १० लाख धरौटीमा छाडिएकी हुन् । तर प्रहरीमा हाजिर भएका धनपालथान गाउँपालिका– ४ का सञ्चालक रोशन राजवंशीलाई मंसिर २८ गते पुर्पक्षका लागि अदालतले थुनामा पठाएको थियो ।