लमजुङमा १६ प्रतिशत महिला मतदान अधिकृत

भोलि हुने प्रतिनिधि सभा सदस्य तथा प्रदेश सभा सदस्य निर्वाचनमा लमजुङका ३० वटा मतदान केन्द्रमा महिला मतदान अधिकृत खटिएका छन्  ।

मुख्य निर्वाचन अधिकृतको कार्यालय लमजुङले अधिकृत छैटौँ तहदेखि उपसचिवस्तरका निजामती कर्मचारी र मावि द्वितीय र तृतीय श्रेणीका शिक्षकलाई मतदान अधिकृतमा खटाइएको बताएको छ । 

मुख्य निर्वाचन अधिकृत शिवप्रसाद खनालका अनुसार सहायक मतदान अधिकृतमा नायव सुब्बादेखि अधिकृत तहका कर्मचारी र शिक्षकलाई खटाइएको छ ।

५८ जना महिला सहायक मतदान अधिकृत छन् । जिल्ला कारागार र जिल्ला समन्वय समितिको कार्यालयमा राखिएको अस्थायी मतदान केन्द्रसहित लमजुङमा १ सय ८८ वटा मतदान केन्द्र छन् । 

महिला मतदान अधिकृत र सहायक मतदान अधिकृत महिलालाई सदरमुकाम बेंसीसहर र वरपर बढी खटाइएको छ । त्यसमध्ये पनि नगरपालिकाका मतदान केन्द्रमा खटाइएको मुख्य निर्वाचन अधिकृतको कार्यालयले जनाएको छ ।