आज पनि साँखु जाने सडक बन्द

जोरपाटीबाट साँखुतर्फ जाने सडक आज पनि बन्द गरिएको छ । सडक पीच नगरेको विरोधमा थली बजारका स्थानीयले यातायात अवरुध्द पारेका छन् ।
 

बिहान पौने ८ बजेदेखि सडकमा ढुंगा थुपारिएको छ भने डोरी बाँधेर पूर्णरुपमा आवागमन रोकिएको छ । स्थानीयले यो क्रम गत शुक्रवारदेखि जारी राखेका छन् ।
 
ठेक्का लिएको कम्पनीले भने मेशिन बिग्रेकाले पीच गर्न नपाइएको जवाफ दिएको छ । कम्पनीले हिजैदेखि पीच थालिने बताए पनि आजसम्म सुरसार नगरेकाले सडक बन्द गराउन बाध्य भएको स्थानीयको भनाइ छ ।