सशस्त्रमा व्यापक सरुवा, आइजिपीको दिल्ली यात्रा स्थगित

आगामी पुस २० गतेका लागि तय भएको सशस्त्र प्रहरी महानिरीक्षक (आइजीपी) राजु अर्यालको भारत भ्रमण स्थगित भएको छ । भारतीय गृहमन्त्री अमित शाहले त्यो बेला व्यस्तताका कारण समय दिन नसक्ने अवस्था उत्पन्न भएपछि भ्रमण पछि सरेको  बताइएको छ । 

गृहमन्त्रीको समय तय गरेर आइजीपी अर्यालले छिट्टै भ्रमण गर्ने तयारी छ ।  आइजीपी अर्यालको हिजोबाट हुने भनिएको पश्चिम नेपालको भ्रमण पनि रोकिएको छ । उहाँ बाँके,बर्दिया जाने कार्यक्रम थियो ।

यता,सशस्त्रको नेतृत्व सम्हालेदेखि संगठन सुधारमा केन्द्रित आइजीपी अर्यालले तल्लो दर्जाका प्रहरी कर्मचारीको पक्षमा विभिन्न निर्णय गराउनु भएको छ । सशस्त्रले अस्ति मंगलबार एकैचोटी आठ हजार सिपाहीको सरुवा निकालेको थियो । जसमा सिपाहीहरुलाई उनीहरूको प्राथमिकताअनुसार फारम भराएर सम्भव भएसम्म रोजेको ठाउँमा सरुवा गरिएको बताइएको छ । 

तराईको सीमावर्ती इलाकाका युनिटहरूमा पाँच वर्ष काम गरेका जवानलाई  पहाड र अन्यत्र सरुवा गरिएको छ । त्यस्तै, श्रीमान-श्रीमतीलाई सम्भव भएसम्म एउटै इलाकामा सरुवा गरिएको पनि सशस्त्र स्रोतले जनाएको छ ।