हिमालय एअरलाइन्स नेपालबाट समेत बेइजिङ जाने पहिलो विदेशी कम्पनी

चीनको राजधानी बेइजिङमा झण्डै तीन वर्षपछि विदेशका अन्तर्राष्ट्रिय वायुसेवा कम्पनीले उडान थाल्ने भएका छन् । तीमध्ये हिमालय एअरलाइन्स पहिलो हुने चिनियाँ समाचार समिति सिन्ह्वाले जनाएको छ । 

राजधानीको नयाँ विमानस्थल बेइजिङ तासिङ अन्तर्राष्ट्रिय विमानस्थलमा हिमालय एअरलाइन्सले आगामी मंगलबारदेखि काठमाडौंबाट पुनः उडान थाल्न लागेको हो । चीनले कोभिड १९ महामारीपछि सन् २०२० को मार्च १ देखि सबै अन्तर्राष्ट्रिय उडानमा रोक लगाएको थियो ।

अब चीनको चाइना साउदर्न एअरलाइन्स,चाइना इस्टर्न एअरलाइन्स, बेइजिङ क्यापिटल एअरलाइन्ससँगै हिमालय एअरलाइन्सले पनि उडान शुरु गर्न लागेका हुन् । तीमध्ये हिमालयले साताको एक पटक काठमाडौंबाट उक्त विमानस्थलमा उडान भर्ने र चाइना साउर्दनले हंगकंगमा साताको तीन उडान गर्ने बताइएको छ ।

अब ती उडानबाट बेइजिङ हुँदै हवाई यात्रुहरु युरोप, अमेरिका, एसिया र  अष्काट्रेलियाका  विभिन्न मुलुुकमा जानसक्ने छन् । त्यसको निम्ति चीनले १४४ घण्टाको भीसा फ्रि नीति पनि सार्वजनिक गरेको छ । उक्त अवधीको सो नीति बेइजिङ, थ्येन्चिन र हपेइ क्षेत्रमा लागु हुने छ ।

बेइजिङको दोस्रो अन्तर्राष्ट्रिय विमानस्थल सन् २०१९ को अक्टोबर २७ का दिन उडानको निम्ति खुल्ला गरिएको थियो । तर कोभिड १९ महामारीका कारण पाँच महिनापछि नै बन्द गर्नुपरेको हो ।