डा. सन्दुक रुइतलाई घरमै पुगेर समाजवादीको सम्मान

नेत्र विशेषज्ञ डा. सन्दुक रुइतलाई आज उहाँकै घरमा सम्मान गरिएको छ । नेकपा एकीकृत समाजवादीका सम्मानित नेता झलनाथ खनाल, पूर्व पर्यटनमन्त्री तथा एमाले नेता जीवनराम श्रेष्ठ,काठमाडौं १५ नम्बर वडाध्यक्ष ईश्वरमान डंगोलसहितको टोलीले डा. रुइतलाई सम्मान गरेको हो । 

स्वयम्भू नजिकैको डल्लु आवास क्षेत्रका वासिन्दाले आज बिहान डा.को घर पुगेर सम्मान गरेको बताइएको छ । सो आवास सहयोग समितिका सल्लाहकार डा. रुइतलाई ‘दृष्टि देवता’ को संज्ञा दिइएको छ। उहाँ बहराइनको प्रतिष्ठित इसा अवार्डबाट सम्मानित हुनुभएको खुशीयालीमा उक्त आवासका स्थानीयले अभिनन्दन गरेका हुन् ।

ताप्लेजुङको विकट ओलाङचुङगोलामा जन्मनुभएका उहाँले मोतियाबिन्दूको उपचारमा सरल र सस्तो पद्धतिको आविष्कार गरेपछि विश्व चर्चित हुनुभएको हो । आगामी दिनमा आफ्नो क्षेत्रमा थप सफलताको निम्ति स्थानीयले शुभकामना पनि दिएका छन् ।