धनकुटा महोत्सव घट्नामा २ बालकको अवस्था गम्भिर

जन आस्था

माघ १५, २०७९

धनकुटा महोत्सवमा हिजो साँझ भागदौडमा परी घाइते भएका मध्ये दुई बालकको अवस्था गम्भिर रहेको छ ।

उनीहरुको आइसियुमा राखेर उपचार गर्नु पर्ने भएकोले विराटनगरस्थित अस्पतालमा लगिएको धरानस्थित बिपी प्रतिष्ठान स्रोतले जानकारी दिएको छ । बाँकी १६ जनाको धरान स्थित बिपी कोइराला स्वास्थ्य विज्ञान प्रतिष्ठानमा उपचार भइरहेको छ ।

धरानबाट विराटनगर रिफर गरिएका धनकुटा-५ का विष्णु राईका ६ वर्षीय छोरा अविहाङ लिम्बू र नाम नखुलेको करिब ३ वर्षीय बच्चा छन् ।

घाइतेहरू मध्ये छ जना बालबालिका रहेका छन् । उनीहरू सबैको अनुहारमा चोट देखिएको प्रहरीले जानकारी दिएको छ । बिपी प्रतिष्ठानमा उपचाररत घाइतेहरूको अवस्था सामान्य रहेको समेत प्रहरीले जानकारी दिएको छ। सामान्य चोट लागेका केही बिरामीको डिस्चार्ज भइसकेको छ।

धनकुटामा गत माघ ६ गतेबाट चलेको महोत्सवमा हिजो साँझ गायक प्रमोद खरेलको साँङ्गीतिक प्रस्तुति राखिएको थियो । उक्त शो हेर्न पुगेका दर्शकको भीड नियन्त्रण भन्दा बाहिर गएपछि भागदौड मच्चिएको थियो । भागदौडमा परी ३० जना घाइते भएका छन् ।

तीमध्ये १६ जनालाई बिपी प्रतिष्ठान ल्याइएको छ। दुई जना बालकलाई विराटनगर पठाइएको छ । बाँकीको जिल्ला अस्पतालमा उपचार भइरहेको जिल्ला प्रशासन कार्यालय धनकुटाले जनाएको छ । अप्रिय घटना घटेपछि महोत्सव पनि स्थगित भएको छ।