सशस्त्रले समात्याे ठूलो परिमाणको काठ

झापामा सशस्त्र प्रहरीले ठूलो परिमाणको काठ बरामद गरेको छ । सशस्त्र प्रहरी बल नेपालको नम्बर २ गण हेडक्वार्टरबाट खटिएको टोलीले मेचीनगर नगरपालिका १, कृष्णथुम्की इलाकामा सात सय क्युबिक फिटभन्दा बढी काठ बरामद गरेको बताइएको छ । 

विशेष सूचनाको आधारमा गणपति देवराज अर्यालको नेतृत्वमा खटिएको सात जनाको मोबाइल टोलीले गएराति १२ बजे काठ चोरी तस्करी भइरहेको अवस्थामा काठ फेला पारेको हो । झण्डै पाँच सय क्युबिक फिट सालको गोलिया काठ छाडेर ट्याक्टर चालकहरु फरार भएका थिए ।

दुई वटा ट्याक्टरमा रहेका साल बाहेक अन्य जातका दुई सय क्युबिक फिट काठ र झण्डै एक ट्रक लाथ्रा नियन्त्रणमा लिइएको जनाइएको छ । काठ र ट्याक्टर गरेर ४० लाख मूल्य बराबरको सामान जिल्ला डिभिजन वन कार्यालय चन्द्रगढीमा आज बुझाएको छ ।