ऋण मिनाहाको प्रलोभनमा मीटरब्याज पीडित महिलामाथि बलात्कार

मीटरब्याज पीडितलाई ऋण मिनाह गराइदिने प्रलोभनमा पारेर एक मीटरब्याज पीडित महिलामाथि बलात्कार भएको घटनाका सम्बन्धमा गृहमन्त्री नारायणकाजी श्रेष्ठले चासो राख्नुभएको छ । 

गृहमन्त्रीले घटनाको वास्तविकता बुझ्न पीडित महिलासहित मीटरब्याज पीडित संघर्ष समितिका पदाधिकारीहरुलाई आज दिउँसो मन्त्रालयमा बोलाएर छलफल गरेको बताइएको छ । छलफलमा संघर्ष समितिका अध्यक्ष अवधेश कुसवाह, प्रवक्ता निर्ग नवीन, अभियन्ता कृष्ण सुनुवारलगायतको टोली सहभागी थियो । 

ललितपुरको गोदावरीमा बस्ने पीडित महिलाले रत्नपार्कस्थित शान्तिबाटिकाभित्र रहेका संघर्ष समिति सदस्यहरुलाई भेटेर आफूलाई साहुले बलात्कार गरेको जानकारी गराएपछि यो घटना बाहिर आएको हो । ऋण मिनाहा गरिदिने वाचा गरेर करणी गरेका मीटरब्याजीले उल्टै सम्पत्ति जफत गरेको ती महिलाको गुनासो छ । 

घटनापछि शान्तिवाटिकामै बसेकी उनलाई आज संघर्ष समितिको टोलीले गृहमन्त्रीसँग भेट गराउन सिंहदरबार लगेको हो । उनीहरु दिउँसो साढे २ बजेतिर प्रहरी वृत्त दरबारमार्गको भ्यानमा मन्त्रालय पुगेका थिए ।