विश्वमा बाघको संख्या बढ्यो, नेपालमा तीन सयको हाराहारी

विश्वभर एक शताब्दीअघि एक लाखको हाराहारीमा रहेको बाघको संख्या  सन् २०१० मा घटेर तीन हजार दुई सयमा सीमित भएको थियो । त्यसपछिका विभिन्न मुलुकको प्रयासले यो संख्या बढेर सन् २०१६ मा तीन हजार नौ सय र गत वर्ष चार हजार पाँच सय पुगेको विश्व वन्यजन्तु कोषले जनाएको छ ।

पाटे बाघ विश्वका एक दर्जन मुलुकमा मात्र पाइन्छ । उक्त बाघ जोगाउन सन् २०१० मा रुसको सेन्टपिटर्सवर्गमा आयोजित सम्मेलनले बाघको संख्यालाई सन् २०२२ सम्ममा दोब्बर बनाउने प्रतिबद्धता व्यक्त गरेको थियो । सोही संकल्पअनुसार गत वर्ष बाघको संख्या ४५ सय पुगेको बताइन्छ ।

नेपालमा १५ वर्षअघि बाघको संख्या एक सय २१ थियो । गत वर्ष तीन सय ५५ पुगेको बताइन्छ । तीमध्ये धेरै बाघ चितवन राष्ट्रिय निकुञ्जमा एक सय २८ र बर्दिया राष्ट्रिय निकुञ्जमा एक सय २५ रहेको तथ्याङ्क छ । बाँकेमा २५, पर्सामा ४१ र शुक्लाफाँटा निकुञ्जमा ३६ वटा बाघ रहेको सरकारी आकडामा उल्लेख छ ।

नेपाललगायत विश्वमा भारत, चीन, भुटान, रुस, बंगलादेश, भियतनाम, म्यानमार, मलेसिया, इन्डोनेसिया, थाइल्यान्ड र लाओसमा पाटे बाघ पाइन्छ । 
आज विश्व बाघ दिवसको अवसरमा उक्त जानकारी दिइएको हो । यो वर्ष पनि विश्वमा झैं नेपालमा पनि विभिन्न कार्यक्रमका साथ बाघ दिवस मनाईंदै छ । यस वर्षको बाघ दिवसको नारा ‘मानव–बाघ सहअस्तित्व’ रहेको छ ।

आज जावलाखेलस्थित चिडियाखानामा विशेष कार्यक्रम आयोजना गरिएको छ । सोही अवसरमा बाघसम्बन्धी दश वर्षे (सन् २०२३–३२) कार्ययोजना सार्वजनिक गर्न लागिएको छ । कार्ययोजनामा बाघको संख्यासँगै थपिएको चुनौती व्यवस्थापनका विषय समेटिएको बताइन्छ । 

पाटे बाघ संरक्षणको निम्ति हरेक वर्ष जुलाई २९ का दिन ‘विश्व बाघ दिवस’ मनाउने गरिएको छ ।