क्रिकेट हेर्न काठमाडौँ आउने चितवनवासीलाई सित्तैमा खानपिन

नेपाल प्रिमियर लिग (एनपीएल)को फ्रेन्चाईज टोली चितवन राइनोजले आफ्ना समर्थकलाई चितवन–काठमाडौं निःशुल्क बस सेवा उपलब्ध गराउने भएको छ । 

खेल हेर्न चितवनबाट काठमाडौं आउन चाहने दर्शकलाई यस्तो सुविधा दिने चितवन राइनोजले घोषणा गरेको हो । मंसिर १५ गतेदेखि काठमाडौंमा शुरु हुन लागेको एनपीएलमा राइनोजले पहिलो खेल मंसिर १७ गते काठमाडौं गुर्खाजसँग खेल्दैछ । उक्त दिन चितवन मेडिकल कलेजदेखि कीर्तिपुरस्थित त्रिवि मैदान आउन र फर्कनका लागि दैनिक पाँच वटा बसको व्यवस्था गर्नुका साथै खाजा पनि उपलब्ध गराइने जनाइएको छ । 

‘चितवनबासी क्रिकेट समर्थकहरुको चितवन राइनोज टिमप्रतिको मायालाई सम्मान गर्दै हामीले चितवन राइनोजको खेल भएको दिनमा चितवन मेडिकल कलेजदेखि त्रिवि मैदान र त्रिवि मैदानदेखि चितवन मेडिकल कलेजसम्म निःशुल्क दैनिक पाँच वटा बसको व्यवस्था गरेका छन्,’ सूचनामा उल्लेख छ, ‘यो सेवा टिकट खरिद गर्नुभएका समर्थकहरुले लिन सक्नुहुनेछ । साथै, सम्पूर्णमा खाजाको व्यवस्था पनि गरिने छ ।’