कसले लुकायो रुकुमको जंगलमा ७ थान भरुवा बन्दुक ?

रुकुम पश्चिमको जंगलमा भरुवा बन्दुक फेला परेको छ । मुसिकोट नगरपालिका ७, ग्यामखोलास्थित जंगलमा ती भरुवा बन्दुक फेला परेको बताइएको छ । 

प्रहरीले उक्त जंगलको बीचमा रहेको ओढारबाट सात थान भरुवा बन्दुक हिजो साँझ फेला पारेको हो । जिल्ला प्रहरी कार्यालय रुकुम पश्चिमका प्रहरी निरीक्षक विष्णुप्रसाद श्रेष्ठका अनुसार गोप्य सूचनाका आधारमा बेवारिसे अवस्थामा रहेका बन्दुक फेला पारिएको हो । 

बरामद बन्दुक जिल्ला प्रहरी कार्यालयमा पुर्याएको प्रहरी निरीक्षक श्रेष्ठले जानकारी दिए । तर ती बन्दुक जंगलको ओढारमा कसले र किन राख्यो भन्नेबारेमा प्रहरीले अनुसन्धान थालेको छ । 

स्थानीयले सिकार खेल्न भरुवा बन्दुक प्रयोग गर्ने र ओढारमै लुकाउने गरेको हुनसक्ने आशंका पनि गरिएको छ ।