एकथरी माओवादी बैठकमा कराउँदै, अर्काथरी चन्दामा रमाउँदै

दैलेखबाट माओवादी पार्टीका नाममा चन्दा मागेको अभियोगमा दुई जना पक्राउ परेका छन् । दुल्लुमा नेकपा माओवादीको नाममा चन्दा माग्नेलाई पक्राउ गरिएको प्रहरीले जनाएको छ ।

पार्टीका निम्ति आर्थिक सहयोग भन्दै हिँडेका दुल्लु नगरपालिका १३ का समीर शाही र चन्द्रबहादुर शाही प्रहरी नियन्त्रणमा पुगेका हुन् । दुल्लु नगरपालिकाका मेयर भरत रिजालसँग ५० हजार रुपैयाँ मागिएको रसिद र पत्र बुझाएपछि प्रहरीले उनीहरुको खोजी गरेको थियो ।

विभिन्न सामाग्रीसहित पक्राउ परेका दुवै जनालाई जिल्ला प्रहरी कार्यालय दैलेखले जिल्ला अदालतबाट अनुसन्धानका लागि पाँच दिन हिरासतमा राख्न हिजो अनुमति लिएको छ । चन्दा माग्दै हिँडेको समूह विप्लव नेतृत्वको माओवादी हो ।

यता,राजधानीमा सत्तारुढ माओवादी केन्द्रको केन्द्रीय समिति बैठक हिजोदेखि शुरु भएको छ । बैठकको पहिलो दिन नेतृत्वको कामकारबाहीलाई लिएर चर्को आलोचना भएको बताइन्छ ।