चौधरीको भकारीभित्र चार थान बन्दुक

कैलालीमा प्रहरीले चार थान भरुवा बन्दुक लुकाइराखेको अवस्थामा फेला पारेको छ । गौरीगंगा नगरपालिका ६ का २० वर्षीय सागर चौधरी बन्दुकसहित पक्राउ परेका हुन् ।

उनले घरमा अवैध घरेलु हतियार लुकाएर राखेको सुराकीको आधारमा चार थान एक नाले बन्दुक फेला परेको जिल्ला प्रहरी कार्यालयले जनाएको छ । उनले घरभित्र धान राख्ने गरिएको माटोको भकारीभित्र लुकाएर राखेको अवस्थामा हतियार बरामद भएको हो ।

बन्दुकसँगै प्रहरीले त्यसमा प्रयोग हुने सुरा तीन सय ग्राम र गन्धक एकसय ३० ग्राम बरामद गरेको छ । उनीमाथि आवश्यक अनुसन्धान भइरहेको प्रहरीले जनाएको छ ।