मध्यरातमा दम्पतीमाथि निर्घात कुटपिट, लगत्तै लुटपाट

काभ्रेपलाञ्चोकमा गएराति एउटा घरमा लुटपाट भएको छ । रोशी गाउँपालिका –५, डुम्बल स्थित कामी सिंह लामाको घरमा अपरिचित समूहले घरका दम्पतीलाई कुटपिट गरेर लुटपाट गरेको बताइएको छ ।

मध्यरात १२ बजेको समयमा तीन जनाको समूह घरमा पसेको बताइन्छ । त्यसपछि लामा र उनकी श्रीमतीको मुख खादाले बाँधेर धारिलो हतियार र रड  प्रहार गरेका हुन् । त्यसपछि सुन र नगद लुटेर फरार भएको पीडितहरुले जानकारी दिए ।

घटनामा स्थानीयले रोशी गाउँपालिका ६ का बुद्ध घिसिङ र रोशी गाँउपालिका– ८, खार्पाचोक घर बताएका दुई जनामाथि आशंका गरेका छन् ।

उनीहरुले प्रयोग गर्दै आएको मोटरसाइकल र स्कुटरसहित गाउँलेले शंका गरिएका दुवै जनालाई नियन्त्रणमा लिएर प्रहरी चौकी कटुञ्जे बेसीमा बुझाएका छन् ।