बेइजिङ उड्न ठिक्क परेका तीन जना पक्राउ,अरु पाँच जनामाथि निगरानी

आज बिहान चीनको राजधानी बेइजिङ प्रस्थान गर्न लागेका तीन जना पक्राउ परेका छन् । साउन पहिलो साताको एक क्विन्टल सुन प्रकरणमा संलग्नताको आशंकामा उनीहरुलाई नियन्त्रणमा लिइएको हो ।

दुई जना चिनियाँ नागरिक र एक जना नेपाली बिहान पौने ८ बजे हिमालय एअरलाइन्सको उडानमा बेइजिङ जान लागेका थिए । उनीहरुलाई केन्द्रीय अनुसन्धान ब्युरोको टोलीले पक्रेको हो ।

चिनियाँ राहदानी नम्बर इएच ४३९०८७२ का लिउ फुयान र इएच ८७२१४०१ का लि चियालिनका साथै नेपाली राहदानी नम्बर १७७९६९५ बोकेकी अञ्जना गुरुङमाथि सुन तस्करीमा संलग्न भएको आरोप लागेको छ । 

ब्युरोले मंगलबार अध्यागमन विभागलाई लेखेको पत्रमा अन्य ५ जनामाथि पनि निगरानी राख्न भनिएको छ । यसअघि लिन चछियाङ पनि विमानस्थलबाटै पक्राउ परेका थिए । 

अब नेपालबाट बाहिर जान खोजेमा चोङ चिङचुन,थाङ सिआओ सुए, तिङ सङ फा,याओ पुचङ र चोङचियान हुनमाथि पनि निगरानी राख्न अध्यागमनलाई अनुरोध गरिएको छ ।