गरिबी निवारणको रकम हसुरेका सामुदायिक वनका अध्यक्षविरुद्ध भ्रष्टाचार मुद्दा

इलामको माई नगरपालिकास्थित पशुपति सामुदायिक वन उपभोक्ता समूहका अध्यक्ष कुमारबहादुर बराईलीसहित आठ जनाविरुद्ध विशेष अदालत काठमाडौंमा भ्रष्टाचार मुद्दा दायर भएको छ । 

अख्तियार दुरुपयोग अनुसन्धान आयोगले बराईलीसहित तत्कालीन सचिव रामबहादुर मगर, सल्लाहकार समूह संयोजक अर्जनकुमार थापा, कोषाध्यक्षहरु रामकुमारी खत्री, चन्द्रकला श्रेष्ठविरुद्ध भ्रष्टाचार मुद्दा दायर गरेको बताइएको छ ।

त्यस्तै, उपभोक्ता समूहका उपभोक्ता एवम् चिलाउनेगौंडा हिले खोला क्रसिङ्ग फुटपात पुलका अध्यक्ष दिलबहादुर मगर, कोषाध्यक्ष रस्मिला बराईली र दर्तावाला लेखापरीक्षक चन्द्रबहादुर बस्नेतविरुद्ध पनि मुद्दा दायर गरिएको छ । उनीहरुविरुद्ध पनि आपसी मिलोमतोमा सरकारी रकममा लामो हात गरेको अभियोग छ । 

उपभोक्ता समूहबाट निर्णय नै नगराई लागत इस्टिमेट र प्राविधिक बिल भरपाई नै नराखी उनीहरुले गरिबी निवारण शीर्षकमा विनियोजित रकमलाई कार्यक्रम नै नभएको पुल निर्माणमा खर्च गरेको किर्ते कागज बनाएर ४० लाख भुक्तानी लिएको अख्तियारको दाबी छ । 

आयोगले भ्रष्टाचार निवारण ऐन, २०५९ को दफा ८ को उपदफा (१) बमोजिम उक्त रकम जफत गरी कैद र जरिवानाको मागदाबी गरेको छ ।