फेसबुक आइडी ह्याकपछि साढे १४ लाख ठग्ने गिरोह पक्राउ

फेसबुक आइडी ह्याक गरेर रकम ठग्दै आएका पाँच जनाको गिरोहलाई प्रहरीले पक्रेको छ । नेपाल प्रहरीको काठमाडौं उपत्यका अपराध अनुसन्धान कार्यालयबाट खटिएको टोलीले उनीहरुलाई नियन्त्रणमा लिएको बताइएको छ ।

पक्राउ परेकामा काठमाडौंको नयाँ बसपार्क बस्दै बाराका सिमान्त लामा, अमन्त लामा, शुभेक्षा गुरुङ, अनुप श्रेष्ठ र रोहन तामाङ हुन् । उनीहरु नयाँ बसपार्कस्थित रेसुंगा बुटवल गेष्ट हाउसमा कोठा भाडामा लिएर बस्दै आएका थिए । 

पाँचै जनाले विभिन्न व्यक्तिको फेसबुक आइडी ह्याक गरेर तिनका साथीहरुलाई म्यासेजबाट इसेवा, खल्तीजस्ता वालेटमा रकम जम्मा गर्न लगाएको अनुसन्धानबाट खुलेको छ । 

उनीहरुले हालसम्म ३० वटा फेसबुक आइडी ह्याक गरेको, विभिन्न व्यक्तिको १२ वटा इमेल आइडी प्रयोग गरेको र विभिन्न बहानामा ओटीपी कोडहरु माग्ने गरेको पाइएको छ । 

हालसम्म २२ जना पीडित सम्पर्कमा आएको र १४ लाख ५८ हजार रुपैयाँ ठगेको बुझिएको छ । पक्राउ परेकालाई ठगी तथा विद्युतीय कारोबार ऐन, २०६३ बमोजिम थप अनुसन्धान तथा कारबाहीका निम्ति जिल्ला प्रहरी परिसर काठमाडौं पठाइएको छ ।