पूर्वगृहमन्त्री बालकृष्ण खाँणका अंगरक्षक बेलायतमा प्रकट

नक्कली भुटानी शरणार्थी प्रकरणमा मुछिएपछि पुर्पक्षको निम्ति सुन्धारा कारागारमा रहेका पूर्वगृहमन्त्री तथा नेपाली काँग्रेसका नेता बालकृष्ण खाणका तत्कालीन अंगरक्षक बेलायतमा देखा परेका छन् । नेपाल प्रहरीका असई तेजबहादुर सिलवाल एकाएक बेलायतको राजधानी लण्डन पुगेका हुन् । 

खाण पक्राउ परेपछि सिलवालले सामाजिक सञ्जालमा कुनै पनि सामाग्री पोष्ट नगरेकाले उनको पछिल्लो स्थितिबारे थोरैलाई मात्र जानकारी हुने गरेको थियो । अग्ला कदका सिलवाल टिकटकमा निकै रमाउँथे । दिनहुँ नाचगान गरेको भिडियो बनाएर टिकटकमा हाल्ने उनी अहिले ती सबै काम बन्द गरेर बेलायत पुगेका हुुन् ।

खाण अघिल्लो पटक शिक्षा तथा खेलकुदमन्त्रीको जिम्मेवारीमा रहँदासमेत सिलवाल अंगरक्षकको भूमिकामा थिए । उनले पोखरामा रहँदा स्थानीय व्यापारी, ठेकेदार र टोले डनसँग निकै हिमचिम बढाउँदै धेरै वटा काम ‘फत्ते’ गराएको आरोप प्रहरी संगठनभित्रैकाले लगाएका थिए । दुई वर्षअघि एमाले नेतृत्वको सरकार ढलेर एकाएक खाण गृहमन्त्री बनेपछि ‘अब काठमाडौं गइन्छ, एसपीलाई ठीक पारिन्छ’ भन्दै उनी सरुवा मिलाएर राजधानी आएका थिए । 

अहिले उनै सिलवाल बालकृष्ण नक्कली भुटानी शरणार्थी प्रकरणमा तानिएपछि बेलायत पुगेका हुन् ।