ब्राउनसुगर लिएर हिँडेका तीनजना बेलायतीबारीबाट समातिए

झापा प्रहरीले लागूऔषधसहित तीन जनालाई समातेको छ । गौरादह नगरपालिका वडा नं.४ का २५ वर्षीय सन्देश लिम्बु र मोरङका २६ वर्षीय सुरेश धिमाल र २७ वर्षीय विनोद लिम्बु पक्राउ परेका हुन् । 

विशेष सुराकीका आधारमा ईलाका प्रहरी कार्यालय कुमरखोद र सशस्त्र प्रहरी बल नेपाल बोर्डर पोष्टर टाघनडुब्बाबाट खटिएको संयुक्त टोलीले उनीहरुलाई गएराति झापा गाउँपालिका-१ बेलायतीबारीबाट नियन्त्रणमा लिएको जनाएको छ । 

प्रहरीका अनुसार भारतबाट नेपालतर्फ आउँदै गरेको प्र.१–०२–०४७ प ७०४२ र को.२१ प १०४० नम्बरको मोटरसाइकल चेकजाँच गर्दा मोटरसाइकलमा सवार उनीहरु ब्राउनसुगरसहित फेला परेका हुन् ।  

प्रहरीले उनीहरुको साथबाट ४४ ग्राम २८० मिलिग्राम ब्राउनसुगर, तीन थान मोबाइल, ५१ हजार ८ सय ७५ रुपैयाँ नगद बरामद गरेको छ । साथै, पक्राउ परेकामाथि थप आवश्यक अनुसन्धान भइरहेको जनाइएको छ ।