सुन काण्डमा माओवादी उपाध्यक्षका छोरा समातिए

इलेक्ट्रिक सिगरेट (भेप) मा सुन लुकाइएको तस्करीमा संलग्न रहेको आरोप लागेका पूर्वसभामुख तथा माओवादी केन्द्रका उपाध्यक्ष कृष्णबहादुर महराका छोरा राहुल पक्राउ परेका छन् । 

नेपाल प्रहरीको केन्द्रीय अनुसन्धान ब्यूरो (सीआइबी) को टोलीले राहुललाई आज दिउँसो नियन्त्रणमा लिएको बताइएको छ । 

सोही प्रकरणमा जोडिएका चिनियाँ व्यापारी वाङसँग राहुलको पटक–पटक फोन सम्पर्क भएको सीआईबीको अनुसन्धानबाट खुले पनि उनी पक्राउ परेका थिएनन् । सत्तारुढ दलका शक्तिशाली नेताको छोरा भएकै कारण उनलाई उन्मुक्ति दिइएको आरोपसमेत लाग्दै आएको थियो । 

आमरुपमा समेत यसलाई लिएर सरकार र माओवादी केन्द्रको चर्को आलोचना भएपछि राहुलले सामाजिक सञ्जालमार्फत आफू सिआईबीको अनुसन्धानलाई सघाउन तयार रहेको बताएका थिए । उक्त प्रकरणमा कृष्णबहादुर महरा समेत संलग्न रहेको आरोप छ । महराले भने वाङलाई आफूले फलफूल व्यापारीका रुपमा चिनेको र सुन तस्करीबारे कुनै जानकारी नभएको बताउँदै आएका छन् ।