उदयपुरका जंगे लोकन्थलीमा समातिए, अश्विन बेपत्ता

भक्तपुरमा अवैध हतियारसहित एक जना पक्राउ परेका छन् । उदयपुरको बलैया नगरपालिका-५ घर भई हाल भक्तपुरको लोकन्थली बस्दै आएका ४० वर्षीय जंगे माझीलाई प्रहरीले कटुवा पेस्तोलसहित समातेको हो । 

प्रहरी प्रभाग बालकोटबाट गस्तीमा खटिएको टोलीले हिजो लोकन्थलीको कखरा स्कुल नजिकै बाटोमा शंकास्पद क्रियाकलाप गरी बसेका उनको शरीर खोजतलास गर्ने क्रममा २ थान कटुवा पेस्तोल, १ राउण्ड गोली र बा.४३ प.९००० नम्बरको स्कुटी समेत बरामद गरेको जनाएको छ । 

प्रहरीका अनुसार उनलाई अहिले प्रहरी वृत्त थिमीमा राखिएको छ । त्यस्तै, माझीसँगै भएका ठेगाना नखुलेका अन्दाजी २८/३० वर्षका अश्विन दाहाल चेकजाँचको क्रममा फरार भएकाले उनको खोजी भइरहेको जनाइएको छ । 

प्रारम्भिक अनुसन्धानबाट उनीहरुले लुटपाटको योजना बनाइरहेको भन्ने खुल्न समेत आएको प्रहरीले जानकारी गराएको छ ।