एउटा वृद्धद्वारा श्रीमतीको हत्या, अर्काले आश्रमका मित्रको

रसुवामा श्रीमतीको हत्या गरेको आरोपमा एक वृद्ध पक्राउ परेका छन् । गोसाईंकुण्ड गाउँपालिका ६, रेडपाण्डा चोकस्थित भूकम्प पीडितहरुको आवासस्थलमा बस्दै आएकी ७१ वर्षीया सीता कामीको हत्या भएको छ । उनको हत्या आरोपमा ७१ वर्षीय श्रीमान् सुलाल कामीलाई नियन्त्रणमा लिइएको छ ।

प्रहरीका अनुसार हिजो दिउँसो सीता आवासमा मृत अवस्थामा फेला परेकी हुन् । जिल्ला प्रहरी कार्यालय रसुवाबाट खटिएको टोलीले घटना अनुसन्धानको क्रममा सुलालले उनीमाथि कुटपिटपछि हत्या गरेको खुल्न आएपछि नियन्त्रणमा लिइएको बताएको छ । 

यता राजधानीको गौशालास्थित वनकालीमा रहेको मानव सेवा कल्याण आश्रममा मकवानपुरका ५० वर्षीय अमरराज पुडासैनीको हत्या भएको छ । उनको हत्या गरेको आरोपमा सोही आश्रममा बस्दै आएका ७२ वर्षीय जगतबहादुर तामाङलाई प्रहरीले नियन्त्रणमा लिएको छ ।

तामाङले इट्टा प्रहारबाट पुडासैनीको हत्या गरेको प्रहरी वृत्त गौशालाले जनाएको छ । घटनाबारे थप अनुसन्धान भइरहेको छ ।