हत्या गरिएका सबैमाथि धारिलो हतियार प्रहार, पोष्टमार्टमको निम्ति शव शिक्षण अस्पतालमा

काठमाडौं, तीनकुनेस्थित गैह्रीगाउँमा गएराति हत्या गरिएका चारै जनाको शव शिक्षण अस्पताल महाराजगञ्ज लगिएको छ । तीमध्ये तीन जना एकै परिवारका हुन् ।

तीनकुनेको दिव्य सःमिल भित्र काठले बनाइएको एक तले जस्ताको टहरोमा उनीहरुको शव फेला परेको हो । दुई पुरुष र दुई महिलाको शव धारिलो हतियार प्रहार भएको अवस्थामा फेला परेको काठमाडौं उपत्यका प्रहरी कार्यालयका प्रवक्ता, प्रहरी वरिष्ठ उपरीक्षक दिनेशराज मैनालीले बताएका ।

उनीहरुमध्ये तीन जना एकै परिवारका हुन् । अन्दाजी ५६ वर्षे कुमार भुजेल, उनकी श्रीमती ५२ वर्षकी अम्बिका, कुमारकी आमा वर्ष ७६ की शुभद्रासँगै मोरङ बेलबारीका अन्दाजी २० वर्षका नवीन राई सबैको टाउको र शरीरमा धारिलो हतियार प्रहार भएको पाइएको छ । 

दिव्य सःमिल हाल गौशाला बस्ने दोलखा, कालिञ्चोक गाउँपालिका ८ का बालकृष्ण शिवाकोटीको हो । हत्या भएकामध्ये कुमा भुजेल मिलमा गेटपालेको काम गर्दै आएका थिए । उनी पनि दोलखा हो । 

घटनास्थलको काठमाडौँ उपत्यका प्रहरी कार्यालय, काठमाडौँ उपत्यका अपराध अनुसन्धान कार्यालय र जिल्ला प्रहरी परिसर काठमाडौँको टोलीले अनुसन्धान गरिरहेको छ ।