बाख्राले कोदो खाएको रिसमा मान्छे छप्काउने मंगले गोठमा भेटिए

बाख्राले कोदो खाएको निहुँमा झगडा हुँदा धादिङमा एक वृद्धाको ज्यान गएको छ । 

नेत्रावती डबजोङ गाउँपालिका-४ की ७० वर्षकी सुकमाया गुरुङको हत्या आरोपमा प्रहरीले सोही ठाउँका ३५ वर्षीय मंगल गुरुङलाई पक्राउ गरेको छ । जिल्ला प्रहरी कार्यालय धादिङका अनुसार १२ असोजको अपरान्ह ४ बजे सुकमायाको शव भेटिएपछि प्रहरीले अनुसन्धन सुरु गरेको थियो । 

प्रारम्भिक अनुसन्धानबाट हत्या भएको खुलेपछि प्रहरीले मंगल गुरुङको खोजी सुरु गरेकोमा उनी आफ्नो घरदेखि केही पर गोठमा लुकेर बसेको अवस्थामा समातिएको प्रहरीले जनाएको छ । प्रहरीले हत्यामा पयोग भएको खुर्पा पनि बरामद गरेको छ ।

मृतक सुकमायाको गाईबाख्राले पटक-पटक अन्नबाली खाएको रिसमा मंगलले उक्त घटना घटाएको प्रहरीको अनुसन्धानबाट खुलेको छ । सोही विषयमा विवाद हुँदा आफूले सुकमायालाई खुर्पा प्रहार गरेको मंगलले स्वीकार गरेको प्रहरीको भनाइ छ ।