यौन हिंसा गर्ने सरकारी इञ्जिनियरको पेशी सर्यो

घरायसी काममा सघाउने युवतीमाथि यौन शोषण गरेको अभियोगमा पुर्पक्षका लागि जेल चलान भएका सरकारी इञ्जिनियर हरिकुमार पोखरेलले हालेको पुनरावेदनको रिटको सुनुवाई रोकिएको छ । 

उच्च अदालत, पाटनमा आजका लागि सुनुवाई तोकिएकोमा पेशी आगामी बिहीबारका लागि सरेको हो । रिट पेशी चढेसँगै आज बिहान माइतीघर मण्डला र उच्च अदालतबाहिर अधिकारकर्मीहरुले आन्दोलन गरेका थिए । सोही जनदबाबमूलक धर्नाका कारण पेशी सरेको अनुमान गरिएको छ छ । 

काठमाडौं जिल्ला अदालतको फैसला सदर हुने देखिएपछि पोखरेलका अधिवक्ताले पेशी सारेको जानकार स्रोतले बतायो । ‘भित्रभित्रै चलखेल भइसकेकाले हरिकुमार आज निस्किने सम्भावना थियो । बिहानको आन्दोलनले दबाब पुग्यो । जिल्ला अदालतको फैसला सदर हुने सम्भावना बढेपछि पेशी नै सारियो’, स्रोतले भन्यो । 

जिल्लाका न्यायाधीश भोलानाथ ढकालको इजलाशले गत भदौमा मध्यपहाडी लोकमार्ग आयोजनाका निर्देशक पोखरेललाई पुर्पक्षका लागि जेल चलान गर्न आदेश दिएको थियो । उक्त आदेशविरुद्ध पोखरेलले उच्च अदालतमा रिट निवेदन दायर गरेका थिए ।

आफ्नो घरमा काम गर्ने युवतीमाथि पटकपटक बलात्कारको प्रयास गरेको आरोप लागेका उनले धरौटीमा छुट्ने प्रयास गरिरहेका छन् । उनलाई थुनामै राख्नुपर्ने मागसहित आज बिहान महिला अधिकारकर्मीसहितको टोलीले माइतीघर मण्डलामा आन्दोलन गरेको थियो । सोही टोलीले उच्च अदालतबाहिर धर्ना पनि दिएको थियो ।