घुस बुझेकी प्रधानाध्यापकविरुद्ध भ्रष्टाचार मुद्दा दायर

बर्दियाको राजापुर नगरपालिका वडा नम्बर ७, शंकरपुरस्थित सरस्वती बाल प्राथमिक विद्यालयकी प्रधानाध्यापक लक्ष्मीदेवी उपाध्याय घुस रकमसहित पक्राउ परेकी छन् । 

अख्तियार दुरुपयोग अनुसन्धान आयोगले उनलाई आज साढे १४ हजार घुससहित नियन्त्रणमा लिएको हो । आयोगको नेपालगञ्ज कार्यालयबाट खटिएको टोलीले उनलाई सेवाग्राहीसँग घुस रकम लिइसकेको अवस्थामा पक्रेको जनाएको छ । 

आयोग प्रवक्ता भोला दाहालका अनुसार उपाध्यायले हाजिरी गराउन सहजीकरण गरिदिने आश्वासनमा सेवाग्राहीसँग घुस लिएको खुल्न आएको छ । उनीविरुद्ध भ्रष्टाचार निवारण ऐन, २०५९ को दफा ३ बमोजिम विशेष अदालत काठमाडौंमा मुद्दा दायर गरिएको छ ।