यस्तालाई पनि शीतल निवासले दिएको थियो आममाफी

राष्ट्रपति रामचन्द्र पौडेलबाट आममाफी पाएर छुटेको महिना दिन नपुग्दै महिलाको हत्या गरेपछि लोकबहादुर विक भनिने लोकेन्द्र पुनः पक्राउ परेका छन् । 

रुकुमको सानाभेरी गाउँपालिका वडा नम्बर ९, सिम्लीका ३३ वर्षीय लोकेन्द्रलाई प्रहरीले हत्याको आरोपमा पक्रेको छ । खलंगाको सत्कार होटेलमा उनले आफ्नी प्रेमिका मुसिकोट नगरपालिका वडा नम्बर ७ साँखकी २८ वर्षीया भावना विकको चक्कु प्रहार गरी हत्या गरेका हुन् । 

होटलमा महिलाको शव घाँटी रेटेको अवस्थामा फेला परेपछि जिल्ला प्रहरी कार्यालय, रुकुमले अनुसन्धान अघि बढाएको थियो । सोही क्रममा प्रहरीले लोकेन्द्रलाई पक्राउ गरेको हो । 

कार्यालयका प्रहरी नायव उपरीक्षक (डिएसपी) नमराज भट्टराईका अनुसार मंगलबार बिहान होटलको कोठा नम्बर १ मा भावना मृत अवस्थामा भेटिएकी थिइन् । 

माइतीमा बस्दै आएकी भावना र लोकेन्द्रबीच अनैतिक सम्बन्ध देखिएको डिएसपी भट्टराईले जानकारी दिए । प्रहरीले घटनास्थलबाट रगत लागेको धारिलो हतियार, त्यसको खोल र मोबाइल बरामद गरेको छ । 

त्यस्तै, लोकेन्द्रको घरबाट ८५ हजार ८३५ रुपैयाँ बरामद गरिएको प्रहरीले जनाएको छ । उनीहरुले होटलमा त्रिवेणी गाउँपालिकाका विकास केसीको नाममा कोठा बुक गराएका थिए । नातामा श्रीमान श्रीमती उल्लेख गरेका उनीहरुले दिएको विवरण सबै झुठो रहेको प्रहरीले जानकारी दिएको छ ।