महिलाको चरित्र हत्यामा संलग्न युट्युबरमाथि अनुसन्धान थाल्न अदालतको अनुमति

सामाजिक सञ्जालमा महिलाको चरित्र हत्या गर्दै आएका युट्युबर मनोज मानव अर्थात मनोजकुमार महतोलाई जिल्ला अदालतले थप अनुसन्धान गर्न अनुमति दिएको छ ।

हिजो पक्राउ परेका उनलाई सात दिनको प्रहरी हिरासतमा राखेर थप अनुसन्धान गर्न बाटो खुलेको हो । ‘स्टार अनलाइन टीभी’ नामक युट्युब च्यानल सञ्चालन गरेका उनलाई नेपाल प्रहरीको साइबर ब्युरोको टोलीले समातेको हो । आफ्नो चरित्रहत्या गरेको भन्दै एक महिलाले दिएको उजुरीको आधारमा उनलाई हिजो पक्राउ गरिएको थियो ।

स्वःघोषित सामाजिक अभियन्ता तारा बराल र नेपाल प्रहरीका पूर्वएआइजी रणबहादुर चन्द रेष्टुरेन्टभित्र बसेर कुराकानी गरिरहेका बेला भिडियो खिचेर पछिल्लो समय मनोज चर्चासँगै र विवादमा परेका थिए । त्यसक्रममा उनलाई बरालले मुखैमुखमा थुकेर निर्घात कुटेकी थिइन् । 

मनोजको एमाले नेता महेश बस्नेतसँग पनि टक्कर परिरहेको छ ।