अहेवको एसएलसी प्रमाणपत्र नक्कली, भारतबाट किनेर ल्याइएको पुष्टि

गुल्मीको मालिका गाउँपालिका–५ स्थित छापहिले स्वास्थ्य चौकीमा कार्यरत अहेव देवबहादुर महताराविरुद्ध भ्रष्टाचार मुद्दा दायर भएको छ । 

अख्तियार दुरुपयोग अनुसन्धान आयोगले उनीविरुद्ध विशेष अदालत काठमाडौंमा आज मुद्दा दायर गरेको जनाइएको छ । महतारा नक्कली शैक्षिक प्रमाणपत्रको आधारमा नियम विपरीत सरकारी सेवामा कार्यरत रहेको पाइएपछि मुद्दा दायर गरिएको अख्तियारले जनाएको छ । 

भारतबाट एसएलसीको प्रमाणपत्र किनेर ल्याएका उनले लोक सेवा आयोगमा उक्त शैक्षिक प्रमाणपत्र राष्ट्रिय परीक्षा बोर्डबाट जारी भएको उल्लेख गरेर पेश गरेका थिए । सोही आधारमा सरकारी सेवामा प्रवेश गरेर उनले आर्थिक लाभ र सुविधा लिएको अनुसन्धानबाट प्रमाणित भएको हो । 

आयोगले भ्रष्टाचार निवारण ऐन, २०५९ को दफा १६ को कसुरमा सजायको माग गर्दै उनीविरुद्ध मुद्दा दायर गरेको जनाएको छ ।