अल्का अस्पतालका मालिकको विवाद छताछुल्ल, कम्पनी कार्यालयमा दोहोर्याएर उजुरी

एक्काइशौं वर्षगाँठ मनाउने तयारीमा रहेको अल्का अस्पतालमा लगानीकर्ताहरुबीच शेयर विवाद चुलिएको छ । लगानीकर्ताहरु एकले अर्कालाई निषेध गर्ने तहमा पुगेपछि विवाद चर्किएको हो । 

विवाद कम्पनी रजिष्ट्रारको कार्यालयसम्म पुगेको छ । अल्काका अल्पमत शेयरधनी तथा बोर्ड अफ डाइरेक्टर रहेका व्यवसायी रामेश्वर थापाले बराबरी शेयर र सञ्चालक समितिमा समान प्रतिनिधित्व बनाइदिनुपर्ने माग राख्दै कार्यालयमा उजुरी दिएको बताइएको छ । 

यता, अस्पतालका अध्यक्षसमेत रहेका बहुमत शेयरधनी कुमार थापा उर्फ तिलकबहादुर थापा र उनकी श्रीमती विद्या श्रेष्ठ थापा कम्पनी कार्यालयमा उजुरी परेपछि सम्भावित कारबाहीबाट जोगिन अर्का शेयरधनी रामेश्वरसँग हारगुहार गरिरहेको स्रोतले बताएको छ । अस्पताल संचालनमा एकलौटी गरिरहेका थापा दम्पत्ती कीर्ते तथा ठगी प्रकरणमा तानिने भयले अत्तालिएको बताइन्छ । 

२०५८ मंसिर ९ गते स्थापना भएको यो अस्पतालमा एस.एस.जी इन्भेष्टमेण्ट प्रालिको ५० प्रतिशत शेयर छ । बाँकी थापा दम्पत्तीको लगानी हो । इन्भेष्टमेण्टका तर्फबाट अध्यक्ष रामेश्वर थापालाई अस्पतालको सञ्चालक चयन गरिएको छ । तर, थापा दम्पत्तीले ५० प्रतिशत लगानीका सञ्चालकलाई जानकारी नै नगराई आफूखुसी आर्थिक कामकारबाही गर्दै आएका थिए । 

जसका कारण पछिल्लो समय सञ्चालकहरुबीच नै विवाद चुलिँदै गएको स्रोतको भनाई छ । जनाइएअनुसार अस्पतालको आर्थिकलगायतका कामकारबाहीसमेत विवादित देखिएको छ । रामेश्वर थापाको कीर्ते दस्तखत गरी आर्थिक वर्ष २०७७–७८ को वार्षिक साधारण सभा एवं सञ्चालक समिति गठन गरेको पाइएको स्रोत बताउँछ । 

यता, कम्पनी रजिष्ट्रार कार्यालयका कानुनतर्फका उपसचिव टोपबहादुर विष्टले अल्का अस्पतालको शेयर विवादको उजुरी परेको पुष्टि गरे । एक पक्षले सञ्चालक समितिमा समान प्रतिनिधित्व र बराबर शेयर गरिपाऊँ भन्दै उजुरी दिएको उनले जानकारी दिए । 

‘अस्पतालको एक सञ्चालक पक्षले उजुरी दिएको छ । एक कित्ता शेयर कम छ, त्यो बराबरी गरिपाऊँ भन्दै उजुरी आएको थियो । अब त्यो हामीले होइन्, साधारण सभाले गर्ने हो भन्यौं । त्यसपछि पुनः उजुरी आएको छ’, उनले भने । 

तिहारअघि फेरिपनि उजुरी परेको उपसचिव विष्टले बताए । निरीक्षणको माग गर्दै उजुरी हालिएको र कार्यालयले आज गोलाप्रथामार्फत निरीक्षक खटाइदिने उनले जानकारी दिए ।