वैदेशिक रोजगार सम्बन्धी तालिम कक्षामा ८४ इञ्चको स्मार्ट बोर्ड हुनैपर्ने

वैदेशिक रोजगारीमा जाने श्रमिकहरुलाई अभिमुखीकरण तालिम दिने संस्थाहरुले विदेशबाट फर्किएर आएका प्रशिक्षकहरुको व्यवस्था गर्नुपर्ने भएको छ । वैदेशिक रोजगार विभागले ‘अभिमुखीकरण तालिम सञ्चालन कार्यविधि, २०७६’ को दफा ५ को उपदफा (३) संशोधन गर्दै प्रदायकहरुले छानेको क्लष्टरअनुसार सोही मुलुकमा गएर फर्की आएका प्रशिक्षकको व्यवस्था गर्नुपर्ने प्रावधान राखेको हो । 

त्यस्तै, तालिम प्रदायकहरुले प्रत्येक प्रशिक्षण कक्षामा ८४ इञ्चको दुई वटा स्मार्ट बोर्ड, कम्प्युटर प्रिन्टर र ‘एफईआईएमएस’ प्रणालीसँग मेल खाने आईरिस रेटिना हाजिर मेसिन अनिवार्य राख्नुपर्ने भएको छ । विभागले मापदण्ड पूरा गरी आगामी पुस १९ गते अद्यावधिक विवरण पेश गर्नसमेत निर्देशन दिएको छ । 

तालिम प्रदायक संस्थाहरुबारे गुनासो आउन थालेपछि केही कडाइ गरिएको विभागका निर्देशक कविराज उप्रेतीले बताए । मापदण्डअनुसार जनशक्ति र पूर्वाधारको व्यवस्था मिलाएर तोकिएको अवधिमा विवरण पेश नगर्ने संस्थाको कारोबार रोक्का गरिने उनको भनाई छ ।