अध्यागमन अधिकृतसँगको सेटिङप्रति प्रधानमन्त्रीको चासो

सरकारी कर्मचारीकै मिलेमत्तोमा नक्कली कागजपत्र बनाएर भिजिट भिसामा नागरिकलाई खाडी मुलुक पठाई मानव तस्करी हुने गरेको घटनाप्रति प्रधानमन्त्री पुष्पकमल दाहाल प्रचण्डले चासो राख्नुभएको छ । 

आज उपप्रधान तथा गृहमन्त्री नारायणकाजी श्रेष्ठ, श्रम मन्त्री शरतसिंह भण्डारीसहित सरोकारवाला निकायहरुसँगको छलफलमा प्रधानमन्त्रीले यसबारे गम्भीर चासो प्रकट गर्नुभएको हो । 'भिजिट भिसामा जानेलाई कागज पुगेन भनेर विमानस्थलबाट फर्काउने र फेरि केही दिनपछि  सेटिङ मिलाएर पठाउने गरेको गुनासो मैले सुनेको छु, भिजिट भिसामा  घुम्न जानेहरूका सम्बन्धमा अध्यागमन कार्यविधिअनुसार गर्नु, गराउनु होला । जनतालाई हैरानी दिने काम बन्द गर्नुहोला', उहाँले निर्देशन दिँदै भन्नुभयो । 

त्यस्तै, भिजिट भिसा र श्रम स्वीकृति लिएकाहरूलाई विमानस्थलमा सास्ती दिने गरेको गुनासो आएको उल्लेख गर्दै प्रधानमन्त्री प्रचण्डले तत्काल सहज वातावरण सिर्जना गर्न पनि भन्नुभएको छ । त्यस्ता कार्य तत्काल बन्द गरिनुपर्नेमा उहाँको जोड छ ।

प्रधानमन्त्री प्रचण्डले पालिकास्तरसम्म गएर वैदेशिक रोजगारी र भिजिट भिसाबारे सचेतनामूलक कार्यक्रम गर्न र राष्ट्र र जनताको हितमा काम गर्नसमेत सम्बन्धित सबै निकायलाई निर्देशन दिनुभएको छ ।

त्रिभुवन अन्तराष्ट्रिय विमानस्थलस्थित अध्यागमन अधिकृत, प्रहरी र विभिन्न एअरलाइन्ससँगको मिलेमतोमा नक्कली कागजपत्रका आधारमा भिजिट भिसा बनाएर मानव तस्करी हुने गरेको तथ्य केही दिनअघि खुलासा भएको थियो ।