जिबी राईलाई समातेर ल्याउन प्रधानमन्त्री सङ्ग हारगुहार

सूर्यदर्शन बचत तथा ऋण सहकारी संस्थाका पीडितहरुले जिबी राईलाई पक्राउ गरिदिन प्रधानमन्त्री पुष्पकमल दाहाल प्रचण्डलाई ज्ञापन पत्र बुझाएका छन् । 

आज पोखरा महानगरको कार्यक्रममा सहभागी हुन त्यहाँ पुग्नु भएका प्रधानमन्त्रीलाई उद्योग वाणिज्य संघको अमृत कक्षमा भेटेर सहकारी पीडितहरुले ज्ञापन पत्र बुझाएका हुन् । 

भेटमा जिबी राईलाई चाँडो पक्राउ गरेर आफूहरुको बचत रकम फिर्ता गराइदिन आग्रह गरेको सहकारी पीडित संघर्ष समितिका संयोजक किरण श्रेष्ठले बताए । उनका अनुसार प्रचण्डले जवाफमा पीडितहरुको वचत रकम चाँडै फिर्ता हुने आश्वासन दिनुभएको छ । 

संयोजक श्रेष्ठले भनेका छन्,  प्रधानमन्त्रीज्यूसँग कुरा राखेका छौँ । सूर्यदर्शन सहकारीका प्रमुख जिबी राईलाई तुरुन्त पक्राउ गरिदिन आग्रह गर्यौँ । उहाँले पनि छिट्टै समस्या समाधान गर्ने प्रतिबद्धता जनाउनुभएको छ ।

स्मरण रहोस्,सूर्यदर्शन सहकारीमा मात्रै जिबी राईले १ हजार ३५ बचतकर्ताको १ अर्ब ३५ करोड ५३ लाख हिनामिना गरेर फरार छन् । 

पीडितहरुले उनीसहित १९ जनाविरुद्ध प्रहरीमा उजुरी दिएका थिए । तर अहिलेसम्म ५ जना मात्रै पक्राउ परेका छन् ।

पीडितहरुले माघ २२ गते पनि दोस्रो पटक राष्ट्रिय स्वतन्त्र पार्टीका सभापति रवि लामिछानेसहित १८ व्यक्ति र कम्पनीविरुद्ध जाहेरी दिएका थिए । तर लामिछाने अहिले गृहमन्त्री बनिसकेका छन् ।