राजधानीका धेरै स्थानमा भोलिदेखि पालैपालो बिजुली बन्द

राजधानीका विभिन्न स्थानमा भोलिदेखि केही समय विद्युत आपूर्ति बन्द हुने भएको छ । नेपाल विद्युत प्राधिकरणले रत्नपार्क वितरण केन्द्रअन्तर्गत विद्युतीय लाइन भूमिगत गर्ने कार्यका लागि विद्युत आपूर्ति प्रभावित हुने जानकारी दिएको छ । 

जसअनुसार नयाँबजार फिडरअन्तर्गत खुसिबू, सोह्रखुट्टे चोक, भ्याली कोल्ड स्टोर, पिपुल्स डेन्टल अस्पतालमा भोलि बिहान ११ बजेदेखि साँझ ५ बजेसम्म विद्युत आपूर्ति बन्द हुनेछ । 

पर्सि पनि नयाँबजारसहित क्षेत्रपाटी फिडरमा सोही समयसम्म बत्ती जाने जनाइएको छ । क्षेत्रपाटी फिडरअन्तर्गत टेकू, पुष्पलाल पार्क, ढल्कु, क्षेत्रपाटी चोक, धोबिचौर, ठहिटी, पकनाजोल र कान्तिपथ क्षेत्रमा विद्युत आपूर्ति बन्द हुनेछ । 

त्यस्तै, आगामी आइतबार भिमसेनस्थान फिडरअन्तर्गत वडा नम्बर १२, ह्युमत, जैसीदेवल, चिगमंगल, भिमसेनस्थान र काष्ठमण्डपमा बिजुली बन्द गरिने प्राधिकरणले जानकारी दिएको छ ।  

जेठ ८ गते भिमसेनस्थानसहित त्रिुपरेश्वर फिडरअन्तर्गत टेकू, पचली, भैरव मन्दिर, बम्सीघाट, सवलबहाल, त्रिपुरेश्वर र विश्वनिकेतन स्कुल क्षेत्रमा विद्युत आपूर्ति प्रभावित हुने तालिका छ ।